ថ្ងៃទី ១ តុលានេះ ជាថ្ងៃដែលផ្លូវល្បឿនលឿន បើកឲ្យធ្វើដំណើរ ដោយឥតគិតថ្លៃរយៈពេលមួយខែពេញ ប៉ុន្ដែដោយសារតែធ្លាប់មានករណី បងប្អូនប្រជាពលរដ្ឋអ្នកនៅក្បែរផ្លូវល្បឿនលឿន ធ្លាប់កាត់របងលួសសុវត្ថិភាព ដើម្បីឆ្លងកាត់ផ្លូវដោយគ្មានការអនុញ្ញាត ក្រសួងចេញសេចក្ដីរំឭក ឲ្យប្រើប្រាស់ផ្លូវកាត់ទទឹងដែលក្រសួងធ្វើឲ្យជំនួសវិញ។ 

យ៉ាងណាមិញ របងសុវត្ថិភាពនេះ ត្រូវបានធ្វើឡើង ក្នុងគោលបំណងការពារមិនឲ្យ អ្នកធ្វើដំណើរថ្មើជើង សត្វពាហានៈផ្សេងៗផ្លងកាត់ ដូច្នេះ ក្រសួងបានចេញសេចក្ដីជូនដំណឹងឲ្យបញ្ឈប់សកម្មភាពកាត់របងសុវត្ថិភាពនេះ ព្រោះថាការធ្វើបែបនេះ នឹងបង្កគ្រោះថ្នាក់ដល់អ្នកបើកបរ និងប្រជាពលរដ្ឋខ្លួនឯងផ្ទាល់ ព្រមទាំងប្រឈមមុខនឹងបទល្មើស​ ផ្លូវច្បាប់ផងដែរ។ 

សម្រាប់បងប្អុនប្រជាពលរដ្ឋដែលត្រូវការធ្វើដំណើរឆ្លងកាត់ផ្លូវល្បឿនលឿន ក្រសួងមានផ្លូវ និងស្ពានរំលងសម្រាប់ឲ្យឆ្លងកាត់ ដូច្នេះបងប្អូនប្រជាពលរដ្ឋ មិនចាំបាច់ត្រូវការកាត់របងលួស ដើម្បីឆ្លងចូលទៅក្នុងផ្លូវល្បឿនលឿន ផ្ដេសផ្ដាស​ដែលអាចបង្កជាគ្រោះថ្នាក់ដល់អ្នកធ្វើដំណើរលើដងផ្លូវ ដែលកំពុងតែពេញល្បឿននោះទេ ។

ក្រសួងបានបញ្ជាក់ថា បើសិនជាបងប្អូនប្រជាពលរដ្ឋត្រូវការឆ្លងកាត់ផ្លូវនេះជាចាំបាច់ អាចឆ្លងតាមផ្លូវកាត់ទទឹងផ្លូវធំបាន ដែលមានផ្លូវក្រោមដី ២០១ កន្លែង និងស្ពានរំលងកាត់ទទឹង ២០ ស្ពាន ដែលសម្រួលដល់ការឆ្លងកាត់របស់ប្រជាពលរដ្ឋ ដោយមិនបាច់បារម្មណ៍ រឿងប៉ះពាល់ចរាចរណ៍អ្នកធ្វើដំណើរ និងមានសុវត្ថិភាពសម្រាប់ខ្លួនឯងផងដែរ។ 

អត្ថបទ៖ Andra